Juisi hizi zinaweza kukusaidia kubana bajeti ya vinywaji msimu huu wa sikukuu

• Ni pamoja na juisi ya ubuyu, nanasi na maembe.
• Juisi hizi zinaweza kukusaidia kubana bajeti ya vinywaji msimu huu wa sikukuu.

---

Msimu wa sikukuu ni kipindi cha furaha, mapumziko na kukutana na watu wa karibu. 

Ili kufanya sherehe ziwe na mvuto zaidi, vinywaji baridi na rahisi kutengeneza vinaweza kuongeza ladha ya msimu bila kutumia gharama kubwa. 

Kwa kutumia malighafi zinazopatikana kirahisi sokoni, unaweza kutengeneza vinywaji vitamu, vyenye afya na vinavyofaa kwa familia yote. 

Na hivi ndio vinywaji vitano vinavyofaa katika msimu huu wa sikukuu ambavyo leo ndani ya jikopoint.co.tz tunakuletea ili kubana bajeti

1. Juisi ya ukwaju

Kinywaji cha ukwaju kina ladha ya uchachu mtamu ambayo huleta ladha nzuri na kusisimua mwili hasa kwenye joto la msimu wa sikukuu.

Mbali na virutubisho kama vitamini B na madini yanayosaidia mmeng’enyo wa chakula yanayopatika katika juisi hii, ukwaju hutumika pia kupunguza maumivu, kutuliza usumbufu wa tumbo, na kutuliza homa.

Ili kutengeneza juisi hii utahitaji ukwaju, sukari/asali, tangawizi au machungwa ili kutoa harufu nzuri na kuongeza utamu.

2. Juisi ya ubuyu

Ubuyu ni kinywaji chenye ladha tamu na uchachu kidogo, na kinajulikana kwa kuwa na virutubisho vingi ikiwemo vitamini C

Pia, juisi ya ubuyu ina madini kama vile kalsiamu, magnesiamu, na fosforasi, ambayo ni muhimu sana kwa afya ya mifupa.

 Ili kukitengeneza, kinywaji hiki utahitaji mbegu za ubuyu au unga wake, maziwa mazito ingawa sio lazima au sukari ili kuongeza ladha zaidi na kuwavutia watu wengi.

Unaweza kuongeza vanila kidogo au kuchanganya na juisi ya ndizi au embe ili kuleta ladha tamu zaidi.\

3. Juisi ya rozela (Hibiscus)

Rozela ni kinywaji chenye rangi nyekundu ya kuvutia pamoja na ladha ya uchachu inayofanana kwa watu wa rika zote. 

Ni kinywaji kinachotuliza mwili na hutumiwa sana wakati wa joto na wale wanaopenda kuongeza damu mwilini kwa kutumia vitu vya asili.

Wataalamu wa afya wanasema utumiaji wa juisi hii unaweza kuongeza damu ikiwa utatumiwa mfululizo kwa angalau wiki mbili.

Ili kutengeneza kinywaji hiki utahitaji rozera/ choya, sukari, mchai chai au maganda ya nanasi. 

Ikiwa unahitaji kuongeza ladha zaidi katika kinywaji hiki unaweza kuongeza limao, tangawizi au hata kuchanganya na juisi ya apple kwa ladha ya ziada.

4. Juisi ya Embe

Baada ya kula na kushiba pilau ama biriani la sikukuuu unaweza kutumia kinywaji hiki kizuri ambacho ni chanzo kikubwa cha virutubisho ikiwemo vitamini A, vitamini C, nyuzi nyuzi na wanga

Kinywaji hiki pia huchangamsha mwili na kumpa mnywaji hamasa ya kuendelea kula hasa mwanamke mjamzito kwa sababu ya kiwango cha juu cha folate, ambayo ni muhimu kwa ukuaji wa ubongo na uti wa mgongo wa mtoto.

Kwa wakazi wa Dar es Salaam hasa wanaokaa karibu na soko la Buguruni embe moja kubwa wananua kuanzia Sh400 hadi Sh600 jambo ambalo humrahisishia mfanyabiashara na mtumiaji kufaidika na bei hii.

Hata hivyo, uwepo wa vitamini A na C, kwenye embe, hukifanya kinywaji hiki kuwa na sifa ya kustarehesha na kushibisha. 

Ili kutengeneza kinywaji hiki utahitaji maembe, tangawizi, sukari au asali kulingana na ladha unayotaka.

Unaweza kuongeza nanasi au passion (karakara) ili kuleta ladha tamu inayovutia.

5. Juisi ya Nanasi

Juisi ya nanasi ina sifa ya kuwa tamu, nyepesi na yenye harufu ya kuvutia, ikifanya kuwa mojawapo ya vinywaji maarufu wakati wa sherehe. 

Nanasi lina bromelain inayosaidia mmeng’enyo wa chakula, hivyo hutuliza tumbo baada ya kula vyakula vingi vya sikukuu.

Faida za juisi ya nanasi ni pamoja na kusaidia mmeng’enyo wa chakula, kusaidia kupunguza uzito na kusaidia tishu pamoja na ngozi kupona haraka.

Kutengeneza juisi hii utahitaji, nanasi, tangawizi, hiliki, au mdalasini.

Ikiwa huwezi kunywa juisi ya nanasi yenyewe unaweza kuchanganya na matunda mengine kama maembe, ndizi, parachichi, dafu au tikiti maji kwa mchanganyiko mtamu zaidi.

Hebu tuambie umepanga kuandaa kinywaji gani kwa ajili ya wapendwa wako msimu huu wa sikukuu?